Sikop ang duha ka indibidwal atol sa entrapment operation sa National Bureau of Investigation- Central Visayas Office (NBI-CEVRO) human mangayo og ₱1 million bugti sa dili pagpakatap sa giingong “sex video” sa usa ka babayeng negosyante kuyog ang usa ka lalaki.
Giila ang mga suspek nga sila si Jaime Lisondra Ferrer taga Brgy. Borbon, Samboan ug Raul Fajardo Dumagil kinsa mulopyo sa De Jesus Compound, Brgy. Duljo Fatima, ning dakbayan sa Sugbo.
Nadakpan ang duha sulod sa usa ka kan-anan sa dakong mall diha sa maong dakyanag niadtong sa Hunyo 18, 2024 human nila nadawat ang marked money nga mobalor og P200,000 sa usa sa mga NBI undercover agent nga ang maong operasyon pinangulohan ni NBI Agent Wenceslao Galendez.
Matod sa NBI-CEVRO nga ang duha daan nang nahatagan ug P70,000 sa biktima nga usa usab ka casino financier.
Apan giingong wala pa gyud kini matagbaw kay gusto niini og 1-milyones pesos.
Tungod niini ang negosyante nidangop sa abogado pinaagi ni Atty. Jayson Repaso diin sila miduol sa buhatan ni NBI CEVRO Regional Director Rennan Augustus Oliva hinungdan sa paglusad sa hinanali nga entrapment operation.
Nasayran usab nga napakita na sa mga suspek ang sex video ngadto sa lalaking higala sa negosyante ug gani nangayo sab sila ug “pahalipay” bugti niini.
Ang duha ka mga suspetsado gipasakaan og kasong may kalapasan sa RA 9995 o mas giila sa Anti-Photo and Video Voyeurism Act of 2009 ingon man RA 10175 o mas giila sa Cybercrime Prevention Act of 2012 lakip na ang Robbery ug Extortion ug gipaubos na sa inquest sa Cebu City Prosecutor’s office.
