Uyon si Senador Alan Peter Cayetano sa sugyot ni Senate Majority leader Francis Tolentino nga kinahanglang magtagbo ang National Security Council (NSC) aron makahimo og posibleng tubag sa agresibong aksyon sa China.
Taliwala niini, nanawagan gihapon si Cayetano og diplomatikong solusyon sa nagkagrabeng tensiyon sa West Philippine Sea.
Ingon man nga nanghinaot ang senador nga aduna pa’y high level talks tali ni Presidente Ferdinand R. Marcos Jr. ug Presidente sa China nga si Xi Jinping sa mini-NSC nga wala’y politika.
Gusto usab ni Senador Christopher ‘Bong’ Go nga masulbad sa malinawon ug diplomatikong paagi ang mga isyu sa WPS.
Giinsistir ni Go nga ang pagrespeto sa usa’g usa mao ang yawe sa paghupay sa tensyon ug pagsulbad sa mga panaglalis.
Gihatagan usab og gibug-aton sa magbabalaod nga isip mga miyembro sa international community, kinahanglan nga masubay sa mga prinsipyo ug tumong nga gipahayag sa United Nations Charter ug sa 1982 UN Convention on the Law of the Sea (UNCLOS), diin ang Pilipinas ug China kay susama nga signatory.
