THAILAND-Gitan-aw sa lokal nga mga awtoridad sa Bangkok, Thailand ang posibilidad nga cyanide poisoning ang nakapatay sa 6 ka mga tawo nga nakit-an nga patay sulod sa usa ka luxury hotel room.
Matod sa Thai police, posibleng nahilo ang mga biktima sa mga tasa sa tsa ug kape nga ilang nainom nga adunay cyanide nunot sa panaglalis nga nalambigit sa dili maayong investments.
Ang pagkadiskobre sa mga patayng lawas sa mga biktima nahitabo human ang usa ka kawani sa 5 star nga Grand Hyatt Erawan sa Bangkok misulod sa usa ka suite nga lawak sa ikalimang andana sa hotel human ang mga bisita nasipyat sa ilang oras sa pag-check out sa kapin sa 24 ka oras.
Sa pag-abot sa Thai police sa lugar, ilang nakit-an ang mga lawas sa 3 ka lalaki ug 3 ka babaye, usa ka lamesa nga puno sa wala matandog nga pagkaon nga giputos sa plastik ug gigamit nga baso nga adunay mga timailhan sa puti nga pulbos.
Ang cyanide nadiskobrehan sa likido nga sulod sa usa ka teapot ug sa tanang 6 ka tasa sa kape.
Base sa inisyal nga imbestigasyon sa Thai police, posibling usa sa namatay ang naghilo usab sa iyang mga kauban. Lakip sa namatay mao ang 2 ka Vietnamese-American ug 4 ka Vietnamese national.
