METRO MANILA-Kapin sa 10 ka mga tawo ang namatay sa bagyong Enteng nga mihapak sa pipila ka bahin sa Pilipinas partikular na ang Luzon sukad niadtong Domingo sa gabii.
Sumala sa mga lokal nga awtoridad ug mga wire agencies, pito ang natala sa Antipolo City, lakip ang pito ka biktima sa pagdahili ug tulo ang nangalumos.
Lakip sa namatay sa pagdahili sa yuta mao ang usa ka mabdos ug duha ka bata nga nagpangidaron og 12 ug 15 anyos nga nangatulog dihang nahitabo ang insidente.
Samtang sa Bicol sa Naga, usa ka tawo ang nakuryentihan ug usa ka bata ang nalumos.
Diri sa Central Visayas, Base sa kompirmasyon sa National Disaster Risk Reduction and Management Council (NDRRMC), duha ang namatay ug 10 ang naangol subay sa pagdahili sa yuta sa Cebu.
Ang Office of Civil Defense (OCD) padayong nagtambag sa mga regional directors aron masiguro ang epektibo nga pagpatuman sa mga advisories, pagpangandam ug mga lakang sa pagtubag alang sa Bagyong Enteng ug ang epekto sa habagat.
Gawas sa liboan nga namakwit tungod sa baha, gikataho usab sa Philippine Coast Guard (PCG) nga kapin sa 3,000 ka mga tawo ang na-stranded sa mga pantalan tungod sa dautang panahon.
Sa 3,383 ka mga pasahero, mga drayber sa trak ug mga katabang sa kargamento gikatahong nalangan sa Southern Luzon, Bicol, Eastern Visayas ug Western Visayas.
Aduna usay 29 ka mga domestic flights ang gikansela sa Manila International Airport Authority (MIAA) kagahapon tungod sa grabeng panahon.
