DAVAO CITY-Nanumpa na si Davao City Mayor Sebastian “Baste” Duterte isip sakop sa Partido Demokratiko Pilipino-Lakas ng Bayan (PDP-Laban).
Ang iyang amahan nga si kanhi Presidente Rodrigo Duterte maoy nangulo sa pagpanumpa sa mayor.
Ang kanhi presidente maoy kasamtangang tsirman sa maong partido politikal.
Mitambong usab sa maong kalihukan ang presidente sa PDP-Laban, Sen. Robinhood “Robin” Padilla, Sen. Ronald “Bato” dela Rosa ug ubang opisyal sa grupo.
Kahinumduman nga si Bise Presidente Sara Duterte una na nga niingon nga modagan sip senador ang iyang mga igsuon nga sila si Mayor Baste ug Rep. Paolo Duterte, lakip ang ilang amahan.
Apan sa buwag nga pakighinabi, gihimakak kini sa kanhi hepe ehekutibo tungod kay tigulang na siya ug humana na sa politika.
Gipaambit usab sa bise presidente nga posibleng modagan si Mayor Baste pagka-presidente sa 2028, samtang mobalik siya sa lokal nga kagamhanan human sa iyang termino isip bise presidente.
