CEBU CITY-Lubog sa baha ang mga lumulupyo sa Sitio Lower Tanay, Barangay Pit-os ing dakbayan sa Sugbo human sa kalit nga kusog nga pagbunok niadtong adlaw nga Sabado, Oktubre 5, 2024.
Ang maong pagbaha gumikan sa naunang naguba nga riprap sa maong dapit Biyernes pa sa gabii niadtong Oktubre 4 dapit sa usa ka subdivision.
Daling mipadala ug hinabang sa mga naapektuhan ang kagamhanang dakbayan sa Sugbo ubos sa kamanduan ni Cebu City Acting Mayor Raymond Alvin Garcia diin naka apod-apod ug mga food packed items ang anaa sa 33 ka mga indibidwal.
Subay sa maong panghitabo, naka rescue sab ang mga sakop sa Cebu City Emergency Medical Services (EMS) og unom ka mga tawo nga na-trap sa maong dapit tungod sa kusog nga paghaguros sa tubig-baha didto mismo sa ilang mga panimalay.
Sa pinakaulahing taho, miabot sa 98-ka mga indibidwal ang apektado sa maong panghitabo diin sakop kini sa 25-ka mga pamilya sulod sa 22-ka mga panimalay.
Sigon pa sa Cebu City-Department of Social Welfare and Services (DSWS) pinaagi ni Officer-in-Charge Baby Portia Comendador Basmayor nga kasamtangang anaa na sa mga evacuation center sa mga duol nga tunghaan ang mga apektadong pamilya.
