Gikatahong sunod nga lakang nga buhaton sa House Quad Committee (Quadcom) nga nag-imbestigar sa extrajudicial killings (EJKs) sa panahon sa Duterte administration kay mao ang pagsubay sa money trail nga gigamit sa pag-insentibo sa mga pulis sa duguong gubat batok sa drugas.
Kini sumala ni Quadcom co-chair Reps Bienvenido “Benny” Abante Jr. ug Dan Fernandez, kinsa miingon nga ang mega-panel nangayo og tabang gikan sa Anti-Money Laundering Council (AMLC) aron masubay ang cash flow nga nalambigit sa mga operasyon.
Ang maong lakang nahitabo human sa testimonya ni kanhi Philippine Charity Sweepstakes Office General Manager Royina Garma, kinsa mipasangil nga ang cash rewards sa pagpatuman sa EJKs gipaagi sa banking system.
Kahinumduman nga gibutyag ni Garma ang reward system luyo sa mga pagpatay ug gidetalye ang mga tahas ni Duterte ug sa iyang suod nga katabang, nga si Senador Christopher “Bong” Go, sa pagdumala sa makamatay nga anti-drug operations.
Gidugang ni Fernandez nga ang paggamit sa mga institusyong pinansyal alang sa mga ilegal nga kalihokan usa ka seryoso nga krimen.
Hinungdan nga ang Quadcom kay nagplano nga pormal nga mangayo og tabang sa AMLC ning semanaha.
Nagtuo ang mga magbabalaod nga ang pinansyal nga imbestigasyon maghatag og katin-awan sa kinatibuk-ang gidak-on sa dalan sa kuwarta luyo sa bangis nga kampanya batok sa droga ni Duterte.
