CENTRAL VISAYAS-Nakahukom ang Highway Patrol Unit 7 sa pagsugyot ngadto sa Traffic Board pinaagi ni Konsehal Rey Gealon nga mobuhat og ordinansa aron sa pagbutang og no parking ug no stopping sa Red Cliff sa Trans Central Highway aron dili na kini tambayan sa mga motorista ug mga mamitikay sa maong lugar.
Mao kini ang nahimong desisyon human sa laing disgrasya sa TCH niadtong Domingo, Oktubre 13, 2024 diin nakalas ang usa ka rider human napasok sa usa ka Sports Utility Vehicle.
Matod ni Police Lieutenant Colonel Wilbert Parilla, ang Regional Chief sa Highway Patrol Unit 7 nga nakita nila ang pagtapok sa mga riders ug mamitikay sa lugar hinungdan nganong adunay daghang ma-disgrasya tungod sa pag-gara-gara sa mga motorista panahon sa Sabado ug Domingo.
Dugang pa niini nga kung aduna na’y ordinansa kay mamahimo na nga manakop ang mga sakop sa Cebu City Transportation Office lakip na ang Highway Patrol Unit 7.
Gawas niini nakig-alayon na usab ang ilang buhatan sa Department of Public Works and Highways aron pabutangan nila og rumble strips o kon white solid line sa karsada nga dili na maka motor banking ang mga riders.
