Padayon pa nga gisusi sa Department of Justice ang modus nga gigamit sa grupo ni Alice Guo sa pag-ikyas sa nasod.
Matud ni Justice spokesperson Asec. Mico Clavano, bisan og dili pa mapagawas ang mga detalye sa maong imbestigasyon, tan-awon gihapon sa DOJ ang tanang anggulo sa pag-ikyas sa grupo.
Lakip sa giimbestigahan mao ang posibilidad nga matabangan ang grupo sa pag-ikyas, uban sa impormasyon nga unang nitumaw nga pipila ka dagkong opisyal sa gobyerno ang nitabang.
Gitun-an usab sa DOJ ang mga ebidensiya nga nahipos sa Bureau of Immigration (BI) nga nagpamatuod nga wala migamit og gamay nga bangka ang grupo ni Alice Guo aron makaikyas sa Pilipinas.
Gitumbok sa opisyal ang mga marka sa selyo nga giingong nakit-an sa BI sa mga pasaporte ni Alice Guo ug uban pa niyang mga kauban.
Samtang wala usab gibaliwala sa DOJ ang mga impormasyon nga nitumaw sa pagdungog sa Senado bahin sa pag-ikyas sa kanhi mayor.
