CEB CITY-Gipahibalo sa kagamhanan sa dakbayan sa Sugbo ang pagsuspenso sa klase sa tanang level sa pampubliko ug pribadong tunghaan sa dakbayan karong adlawa, Miyerkules, Oktubre 23, 2024 tungod sa dili maayong panahon dala sa Tropical Storm Kristine.
Kini nga lakang aron masiguro ang kaluwasan sa mga tinun-an ug magtutudlo sa padayon gihapon nga kusog nga hangin ug adunay pag-uwan.
Subay sa maong mando, pipila usab ka mga pribadong tunghaan ang miluwat og advisory nga mikanselar sa ilang klase ug temporaryong mag-online classes.
Gawas sa dakbayan sa Sugbo, ang mga kasikbit nga syudad sama sa Mandaue ug Lapu-Lapu City kay nagpadayag usab sa ilang pagkanselar sa ilang mga klase arun sa pagisiguro sa kaluwasan sa mga tinun-an ug magtutudlo.
Gumikan niini, gi-alerto usab ang nagkandaiyang buhatan sa Quick Response Team ug Disaster Risk Reduction Management sa mga dakbayan ug probinsya sa Sugbo hilabi na sa amihanang bahin sa probinsya sa Sugbo tungod kay direkta kining maapektuhan sa bagyo.
Samtang sa pikas bahin, gibutyag ni konsehal Joel Garganera, ang overseer sa Cebu City Disaster Risk Reduction Management nga naka-code blue na ang buhatan ug naka pre-position na ang tanang personnel ug mga ekipo, ingon man ang mga emergency vehicles nga gamiton kung ugaling adunay kadaot nga mahitabo sa dakbayan sa susama sa pagbaha ug pagdahili sa yuta hilabi na niadtong gideklarar nga landslide prone areas.
