PROVINCE OF CEBU- Gihatagan og katin-awan sa kapulisan sa Oslob Municipal Police Station ang mga espekulasyon kabahin sa pagkamatay sa usa ka 15 anyos nga batang babaye nga taga Barangay Hagdan sa Lungsod sa Oslob.
Sa pakighinabi sa Bombo Newsteam kang Police Major Jude Cebrero, hepe sa kapulisan sa Oslob Police Station, gitino niini nga ang inahan sa Biktima nibisita sa ilahang buhatan niadtong nakalabay nga Disyembre 12,2024, aron i-reklamo ang ‘rape incident’ nga nahitabo sa gabie sa Disyembre 9 subay sa kasa-ulugan sa ilang pista.
Hinungdan, nga ang Women and Children Protection Desk (WCPD) sa mao nga station ni-assest sa Inahan ug Biktima, dinhi gipangutana ang biktima kung unsa ang nahitabo.
Gisaysay sa 15-anyos nga biktima nga aduna siyay nakaila nga groupo sa mga kalalakin-an ug gipa-inom siya og beer nga susamag aduna’y gisagol nga maoy nakapapuypoy sa iyang lawas ug gidala matud pa kini sa usa ka lugar, nga dili niya mahinumduman kung diin kining dapita.
Tungod sa maong testimoniya ang biktima lakip na ang babaye’ng pulis gisubay ang dapit kon asa nahitabo ang pag among-among sa bata.
Human sa gihimong pag susi sa lugar kon asa gidala ang biktima sa mga suspek nibalik kini sa estasyon ug didto gipasabot ang bata ug ang Inahan nga subay sa legal nga proseso kinahanglan siya nga madala sa pink room.
Apan ang biktima ni-plead nga dili una siya magpa medical examination.
Gisuwayan pag-kombinsi sa WCPD ang bata, apan nangurog ang bata ug ‘unresponsive’ na kini.
Hinungdan, nga gipapa-uli una sila og gihatagan og instruction nga inig ka ugma petsa 13 mobalik sila sa station aron moadto sa pink room.
Apan, nianang pagka ugma na, petsa 13 ang biktima sa wala damha ang panghitabo sa hapon sa susamang adlaw nakabsan sa kinabuhi.
Sa pagkakarun, padayon pa ang imbestigasyon sa kapulisan sa maong panghitabo aron masuta ang giingung mga suspek, apan wala pa silay ‘Person of Interest’ sukwahi sa nikatap online.
Sa pagtino sa eksaktong hinungdan sa kamatayon sa biktima, ang Regional Forensic Unit sa Police Regional Office nihimo og autopsy ug nangolekta og mga specimen nga gipadala sa Camp Crame alang sa histo-pathological ug toxicological examinations.
Gisusi usab sa kapolisan ang mga kuha sa closed-circuit television (CCTV) aron mahibaw-an ang nahitabo ug mailhan ang mga lalaki.
Si Cebrero niingon nga ang biktima una nang naghisgot nga giatake siya sa mga lalaki, bisan og dili siya sigurado sa eksaktong gidaghanon.
Tungod sa nahitabo, iyang gipahimangnoan ang publiko nga magpabiling mabinantayon samtang likayan ang pagpakatap sa sayop nga impormasyon o espekulasyon.
