Giklaro ni Department of Justice Undersecretary Jesse Andres nga ang subpoena nga gipadala kang kanhi Presidente Rodrigo Duterte kay dili tungod sa mga krimen batok sa katawhan.
Kini kon magpadala gayud og subpoena ang ahensya ngadto sa kanhi presidente, dungan sa ilang imbestigasyon sa giingong mass killings sa war on drugs.
Pagpasabot ni Usec. Andres, agig pagsunod sa ‘due process of law’, kinahanglang ipatawag ang kanhi presidente sa higayon nga makamugna og reklamo ang DOJ nga mahimong ipresentar ngadto sa kanhi Presidente.
Sa pagkakaron, ang DOJ nagpadayon sa paghipos og mga ebidensiya gikan sa National Bureau of Investigation, Philippine National Police, ug uban pang ahensya aron makapangandam og pormal nga reklamo.
Sa higayon nga mapasaka na ang reklamo, matod niya kinahanglang ipatawag ang akusado aron mahatagan og higayon nga makapasabot sa ilang habig.
Matod ni Usec. Andres, kini ang nag-unang rason kung ipatawag o padad-an og subpoena ang kanhi presidente, ug dili tungod sa mga krimen batok sa katawhan.
Una, ang Quad Committee sa House of Representatives nirekomendar sa pagpasaka og kaso batok kang kanhi PRRD ug pipila ka mga kaalyado, human sa 13 ka serye sa mga pagdungog.
Ang nag-unang kaso nga mahimong ipresentar sa kanhi Presidente, sumala sa Quad Comm, mao ang mga krimen batok sa katawhan ug genocide, base usab sa mga ebidensya nga mitumaw sa mga serye sa mga pagdungog.
