CEBU CITY-Ipatuman sa kagamhanan sa dakbayan sa Sugbo ang Liquor ban sa Sinulog 2025 samtang ang street parties kay tun-an pa ni Mayor Raymond Alvin Garcia kung iya ba kining tugotan.
Gikatakdang magpagawas karong semanaha og executive order nga posibleng magdili sa inom 200 ngadto sa 300 metros ang gilay-on gikan sa rota sa Sinulog grand parade.
Ingon man nga padayon pa ang iyang pagtuon kabahin sa oras kung kanus-a magsugod ug mahuman ang liquor ban.
Gawas sa liquor ban, posible usab nga idili sa mayor ang pagpahigayon og mga street parties.
Hinuon, gitun-an pa niini ang kahigayonan nga itugot ang mga party basta sulod lang sa mga establisemento ug dili sa karsada.
Ingon man nga lauman nga bisan unsang orasa mogawas ra ang iyang gihimo nga Executive order sa Sinulog 2025.
Sa laing bahin, gipasalig usab sa mayor nga dili maapektohan ang mga kalihokan sa Sinulog bisan pa man kon dili pa maaprobahan sa Konseho sa Dakbayan sa Sugbo ang 2025 annual budget karong buwana.
Hilabi na nga mitumaw ang posibilidad sa re-enacted budget ang magamit paggasto sa mga kalihokan sa Sinulog sunod tuig tungod kay hangtud karon wala pa man maaprobahan sa mga konsehal ang budget sa 2025.
Kini bisan pa man moabot og sobra 40 ang gidaghanon sa mga contingent nga moapil sa grand parade itandi sa 14 lang sa niaging tuig.
Ingon man nga manghinaot kini nga ang paghas-has sa budget sa konseho kay dili sagulan og pamolitiko inay magpaabot kini nga hingpit na nga maaprobahan ang budget sa dili pa mahuman ning buwana aron aduna pay higayon nga i-review ni Garcia.
