Molusad ang Department of Agriculture (DA) og hugot nga kampanya batok sa manipulasyon sa presyo sa bugas human nitumaw ang mga taho sa giingong pagpangabuso sa pipila ka mga negosyante ug retailers, hinungdan sa pagpahimulos sa mga konsumidor sa Pilipinas.
Matod pa ni DA Secretary Francisco Tiu Laurel Jr. nga duna silay igong rason sa pagtuo nga dunay mga mapatigayon ug retailer nga tinuyo nga nagpahisalaag sa mga konsumidor pinaagi sa paggamit sa branded nga imported nga bugas aron mousbaw ang presyo, human sa pagpahigayon og market analysis.
Isip kabahin sa solusyon, gisugyot ni Laurel ang pagtangtang sa mga brand label gikan sa imported nga bugas.
Gimando usab niya nga tangtangon ang mga label sama sa “premium” ug “special” sa imported nga bugas, tungod kay gigamit kini sa pagpataas sa presyo.
Ang lokal nga gipatubo nga bugas dili sakop sa kini nga mando aron mapanalipdan ang mga mag-uuma ug ilang mga negosyo.
Matod sa DA, ang datus gikan sa rice supply chain nagpakita nga ang markup nga P6 hangtod P8 matag kilo gikan sa landed cost sa imported nga bugas igo na aron makakuha og saktong ganansya.
Pananglitan, ang bugas nga gi-import gikan sa Vietnam nga adunay kinatibuk-ang kantidad nga P40 matag kilo dili angay ibaligya og sobra sa P48 matag kilo.
Gitahasan usab sa ahensya ang legal division niini sa pagsusi kon ang Consumer Price Act mahimo bang ipatuman aron malikayan ang pag-abuso sa presyo sa industriya sa bugas.
Bisan pa sa lakang ni Presidente Marcos nga usbon ang taripa sa bugas gikan sa 35% ngadto sa 15% niadtong Hulyo, nagpabiling taas ang presyo sa pipila ka tatak sa bugas, hinungdan sa pagkadismaya sa mga konsumidor ug sa gobyerno.
Dugang pa ni Laurel nga iyang gitan-aw usab ang posibilidad nga makig-alayon sa Department of Finance (DOF), partikular na sa Bureau of Internal Revenue, sa pagpahigayon og audit sa financial records sa mga rice traders aron maseguro nga masunod ang saktong presyo.
