Nakahukom ang Department of Agriculture nga ibaligya ang bulto nga bugas nga gitipigan sulod sa duha ka buwan o kapin nga anaa sa mga bodega sa National Food Authority (NFA) sa tag P38 matag kilo.
Matod ni DA Sec. Francisco Tiu Laurel Jr., mahimo kining ibaligya sa mga lokal nga kagamhanan sa Metro Manila.
Gipasabot sa kalihim nga ang maong inisyatiba makatabang sa NFA sa pag-decongest sa mga bodega niini isip pagpangandam sa umaabot nga ting-ani.
Sa pagkakaron, puno ang mga bodega sa NFA tungod sa kadaghan sa bugas nga gipalit gikan sa mga lokal nga mag-uuma.
Matod sa kalihim, iya nang gimanduan si NFA Administrator Larry Lacson nga ipagaling ang napalit nga palay aron kini ma-release sa merkado sa Metro Manila sa mas barato nga presyo.
Pinaagi sa maong inisyatiba, nanghinaot ang kalihim nga mas mous-os pa ang presyo sa bugas sa kamerkadohan nga maoy usa sa mga tumong sa kasamtangang administrasyon.
Kung kahinumdoman, ang buffer stock target sa Pilipinas gipataas gikan sa miaging 9 ka adlaw ngadto sa 15 ka adlaw, hinungdan nga gikinahanglan ang pagpalit ug daghang bulto nga bugas gikan sa mga mag-uuma.
Ingon man nga ang limitado nga kapasidad sa mga bodega sa NFA alang sa mas daghang gidaghanon sa humay nga mapalit kay usa ka dakong hagit.
