Mopasaka og mga kaso ang Bureau of Immigration (BI) batok sa mga nanalipod sa mga langyaw nga espiya.
Kini ang pasidaan ni BI Commissioner Joel Viado sa giluwatang pamahayag diin matud niya nga ang maong lakang subay sa kampanya ni Presidente Ferdinand Marcos Jr. aron masiguro nga ang nasud mapanalipdan gikan sa gawas nga mga hulga ug uban pang mga hulga sa soberanya sa nasud.
Kalabot niini, hugot sila nga nakig-alayon sa Department of Justice (DOJ) sa paghipos og impormasyon kalabot sa giingong mga espiya nga bag-o lang nasikop sa National Bureau of Investigation (NBI) ug sa mga gi-monitor sa Armed Forces of the Philippines (AFP).
Dugang ni Viado, nga sa ilang inisyal nga pagtuki, ang maong mga langyaw adunay regular nga immigration status sa Pilipinas, nga nagdugang sa pagduda nga sila nabutang sa ilang kaugalingon sa katilingban.
Busa hugot ang ilang pakig-alayon sa NBI aron masuta kon aduna ba’y indibidwal nga mitabang sa mga suspek sa ilang ilegal nga kalihokan.
Kung gani mapamatud-an nga adunay mitabang o nagtago sa mga espiya, Pilipino man o langyaw kay pasakaan nila kini og tukmang kaso tungod sa pagtago sa mga ilegal nga langyaw nga nakalapas sa Section 46 sa Philippine Immigration Act of 1940.
