CEBU CITY-Gipasirado ni Cebu City Mayor Raymond Alvin Garcia ang operasyon sa Sugbuanon Channel nga usa ka broadcasting arm sa kagamhanang dakbayan diin gitukod niadtong kanhi administrasyon ni Dismissed Cebu City Mayor Michael Rama.
Matod pa ni Garcia nga tungod kini sa redundancy sa operasyon niini sa Public Information Office (PIO) nga usa sa mga gitumbok nga pag-usik-usik sa resources sa kagamhanang dakbayan.
Kaniadtong adlaw sa Dominggo, Pebrero 9 nipahibalo ang Sugbuanon Channel pinaagi sa ilang official Facebook Page nga nanamilit na kini og gi-refer na ilang operasyon sa Cebu City PIO.
Matod pa nga sa walo (8) ka miyembro sa maong buhatan, tulo (3) niini mubalik sa PIO, laing tulo (3) ang dili na mag renew sa ilang kontrata ug ang nahabilin kay gibalhin sa laing departamento sa City Hall.
Ang opisina sa Sugbuanon Channel kay nahimutang sa Cebu City Hall Satellite Office sa karaang MCWD Office diin kabahin kini sa People’s Progressive Radio Media Network (PPRMN) nga usa ka digital platform nga pinundohan sa kagamhanan nga independente sa Cebu City PIO.
