Gikuwestiyon ni Tingog Party list Rep. Jude Acidre sa ‘timing’ sa pagpasaka sa mga kaso nga may kalabotan sa 2025 national budget nunot sa pagpasa sa House of Representatives sa impeachment case batok kang VP Sara Duterte ngadto sa Senado.
Sa press conference, gitawag sa magbabalaod ang maong lakang nga usa ka klaro nga diversion sa tinuod nga isyu nga angay tubagon sa pikas habig.
Bisan pa nga miingon usab ang magbabalaod nga gawasnon nga makapasaka og kaso ang mga reklamante ug kaubang magbabalaod.
Gihimo sa magbabalaod ang pamahayag human opisyal nga gisang-at sa Ombudsman ang 12 ka ihap sa falsification of legislative documents ug graft batok kang House Speaker Martin Romualdez, Majority Leader Manuel Dalipe, ug House budget leaders Stella Quimbo ug Zaldy Co kalabot sa pagkadiskubre sa ‘blank items’ sa bicameral report alang sa 2025 national budget.
Giila ang gisang-at nga reklamo sa giingong pagsal-ot sa nasudnong pundo alang sa 2025, nga mikabat sa P241 bilyon.
Lakip sa nipasaka og reklamo mao sila si Davao del Norte Rep. Pantaleon Alvarez, Atty. Ferdinand Topacio sa Citizen’s Crime Watch, Senate aspirants Jimmy Bondoc ug Raul Lambino, ug Atty. Virgilio Garcia.
Samtang, gihimakak kini ni Cong. Alvarez ang mga pasangil nga ang maong lakang may kalambigitan sa impeachment ni VP Sara Duterte kay matud niya lahi kini sa isyu sa budget nga usa ka criminal case.
