CEBU CITY- Posibleng mapriso ang 37-anyos nga minyong babaye nga taga Talisay City, Cebu human naaktohan sulod sa usa ka motel uban sa iyang 39-anyos nga hinigugma, sa dalan C. Padilla, Barangay Mambaling ning dakbayan sa Sugbo pasado sa alas 5 sa hapon Huwebes, Pebrero 20, 2025.
Ang asawa (gipugngan ang ngalan) taga Lawaan 1 sa dakbayan sa Talisay usa ka Sales Associate samtang ang kabit kay lumad nga taga Tubigon, Bohol nga kasamtangang nagpuyo sa Tungkop lungsod sa Minglanilla sa habagatang Sugbo.
Matod pa sa 37-anyos nga bana nga(gipugngan ang pangalan) nga usa ka Promidiser nga nagduda siya nga adunay gikarelasyon ang iyang asawa.
Hinungdan, nga kaniadtong Huwebes, nakahukom siya nga sundan kini sa usa ka motel diin gikataho nga nasakpan siya nga nag-check-in kauban ang laing lalaki.
Dayon midangop siya sa pinakaduol nga police station aron magpatabang.
Sa pag-abot sa mga polis sa maong edipisyo, ilang nasakpan ang babaye ug ang iyang uyab nga nagdungan og katulog.
Gidala dayon sila sa Mambaling Police Station diin kasamtangan silang gikustodiya.
Mahimong mag-atubang og kasong adultery ang babaye, apan tungod sa mapasayluong Batasan sa iyahang bana, nipili kini nga pasayloon ang asawa aron sa kaayuhan sa ilang pamilya ilabi na sa ilang mga anak.
Gikatahong upat na ka tuig nga buwag ang asawa ug bana, apan kasado pa gihapon kini ug adunay mga anak.
