Gisuspenso sa National Basketball Association (NBA) ang forward sa Milwaukee Bucks nga si Bobby Portis tungod sa giingong paglapas niini sa anti-drug policy sa liga.
Gidili sa NBA si Portis nga makaduwa sulod sa 25 ka duwa diin nagpasabot nga ang 2021 NBA champion dili na makaduwa sa nahibiling bahin sa 2024-2025 regular season.
Matod sa liga, nagpositibo si Portis sa tramadol, usa ka matang sa tambal nga gigamit alang sa severe pain, apan wala giaprobahan nga gamiton sa mga player sa liga.
Basi sa pamahayag sa kampo ni Portis, nasayop lang ang Bucks forward sa pag-inom sa tambal nga iyang nainom.
Asoy usab ni Mark Bartelstein, representante ni Portis, ang basketbolista nasayop nga nagtuo nga ang tambal nga iyang nainom kay Toradol, usa ka tambal sa sakit nga gi-aprobahan sa NBA.
Bisan pa niini, nakahukom ang kampo ni Portis nga dili na moapelar sa desisyon sa NBA.
Tungod sa 25 ka duwa nga pagkasuspenso, si Portis mawad-an og $2.85 milyones nga suweldo.
