Giaprobahan na ni Presidente Ferdinand Marcos Jr. ang pagpagawas sa P700 milyones nga pundo alang sa pagtukod sa child development center sa mga lungsod nga ubos ang kita.
Kini nunot sa hangyo sa early childhood development proponents kang Presidente Marcos sa paggahin og pundo sulod sa sunod nga tulo ka tuig aron mahatagan og access ang mga kabus nga barangay sa early childhood education.
Atol sa usa ka sectoral meeting sa Malacañang uban sa EDCOM 2 ug uban pang ahensya, gisugyot sa Presidente nga himuong CDC ang mga daycare center tungod kay ang mga magtutudlo nakadawat sa samang pagbansay ug ang mga bata anaa na.
Diin ang mga hingtungdan nga ahensya kinahanglan usab nga dugangan ang gidaghanon sa mga gradwado sa mga kurso nga may kalabotan sa edukasyon sa early childhood education, ilabi na sa mga rehiyon nga adunay kakuwang sa mga magtutudlo.
Matod ni Education Secretary Sonny Angara, ang early childhood development initiatives dako og ikatampo sa pagpalambo sa kalidad sa edukasyon sa nasod.
Tungod niini, mokunhod usab ang dropout rate, ug motaas ang completion rate ug literacy sa mga batan-ong estudyante.
Basi sa report sa EDCOM, aduna pay 5,800 ka barangay sa nasud nga wala pay CDC, ug 229 niini nga mga barangay ang lakip sa mga kabus nga LGUs.
Gipasalig sa Department of Budget and Management ang pagpagawas sa pundo alang sa pagtukod sa mga CDC karong tuiga pinaagi sa Local Government Support Fund.
