CEBU CITY-Nakahipos sa dili muminos 62.4 ka toneladang basura ang nahitabong 19th Cebu City-Wide Clean-Up Drive Challenge niadtong Sabado, Marso 15, 2025.
Nahitabo kini sa mga nagladaiyang dapit sa dakbayan ilabi na sa mga agianan sa tubig sama sa suba ug mga baybayon sa syudad.
Gitaho ang maong datos gikan sa report sa Cebu City Department of Public Services (DPS).
Matod ni John Paul Gelasque, ang pangu sa DPS nga umento og dyutay ang basura nga nakolekta kun itandi sa nakalabayng edisyon sa City-Wide Clean-up Drive niadtong nakalabayng Disyembre 2024.
Dugang pa nga sagad sa mga nakuhang mga basura niadtong Sabado kay mga botelya nga plastic, cellophane, ug uban pa.
Kadaghanan niini nahipos sa mga baybayon sa Sitio Mahayahay sa Barangay Pasil ug sa mga naanod sa Guadalupe River.
Kahinumduman nga ang nakalabayng 19th Cebu City-Wide Clean-Up Drive Challenge kay gisalmotan sa pipila ka mga grupo ug organisasyon, mga kawani sa kagamhanan a dakbayan sa Sugbo, ug sa mga taga-ahensya sa nasudnong kagamhahan sama sa Department of Environment and Natural Resources – Central Visayas ug Department of Interior and Local Government – Cebu City.
