Wala gayud moingon si Solicitor General Menardo Guevarra nga sayop ang pakigtambayayong sa gobyerno sa Interpol alang sa pagdakop kang kanhi Presidente Rodrigo Duterte.
Kini maoy gipasiugda ni Palace Press Officer ug PCO Usec Atty. Claire Castro taliwala sa pag-insister sa kampo sa kanhi presidente nga nidaog sila niini human miatras si Guevarra isip abogado sa gobyerno.
Matud ni Castro nga wala na sila makurat nga gigamit na kini sa kampo sa kanhi presidente sa pagsuporta sa ilang petisyon ngadto sa Korte Suprema.
Ang mga anak ni kanhi Presidente Rodrigo Duterte niduso og petisyon sa Korte Suprema alang sa writ of habeas corpus aron mapabalik ang kanhi presidente sa nasod.
Dugang ni Castro nga ang manifestation ni SolGen Guevarra klaro nga nagpahayag nga ang ICC walay hurisdiksyon sa Pilipinas, nga mao usab ang dugay na nga posisyon ni Presidente Ferdinand Marcos Jr.
