Gipalihok na ang Philippine National Police (PNP) sa ilang mga kabtangan aron mapugngan ang mga insidente sa pagdagit sa mga Chinese national sa nasud.
Gihimo ni PNP chief Gen. Rommel Marbil ang maong pamahayag human sa iyang pakigtagbo sa mga sakop sa Federation of Filipino-Chinese Chambers of Commerce and Industry Inc., human sa pagpatay sa Chinese businessman nga si Anson Que.
Sa usa ka pahayag, si Gen. Marbil miingon nga sila nabalaka pag-ayo sa insidente ug dili mohunong hangtod nga ang mga kaso sa pagdagit sa mga Chinese nationals masulbad.
Gidugang niini nga ilang gipalihok usab ang tanan nilang investigative assets ug gihimo ang tanan aron masiguro nga dili na mahitabo ang maong insidente.
Nanawagan usab ang PNP chief alang sa kalinaw ug panaghiusa ug wala usab niya gihulagway nga isolated incidents sa atong nasud kondili ang hiniusang pasalig sa pagpalig-on sa lagda sa balaod ug pagpanalipod sa tanang lungsoranon nga nagpuyo ug nagnegosyo sa Pilipinas.
Ang kaso sa gipatay nga Chinese maoy ikatulong kidnapping incident nga naglambigit sa Chinese nationals sulod sa kapin sa usa ka buwan.
Una ang 14-anyos nga Chinese student nga gidagit sa iyang tunghaan sa Taguig City ug ikaduha ang pagdagit sa tag-iya sa Chinese food kiosk sa Manila.
