CEBU CITY-Gipasakhana na usab og laing kaso si Cebu City Mayor Raymond Alvin Garcia ngadto sa Office of the Ombudsman Visayas nunot sa alegasyong gipamolitika ang pag-apod-apod sa hinabang nga bugas ngadto sa mga residente sa pipila ka mga barangay sa dakbayan sa Sugbo.
Ang reklamo kay naggikan sa pipila ka mga concerned citizens sa dakbayan diin kadaghanan niini kay mga manindahay.
Girepresentahan ni Atty. Mac Gordon ang maong mga reklamante nga nanukad sa priviledge speech ni Cebu City Councilor Mary Ann Delos Santos human naabot sa atensyon niini ang pagpamolitika sa hinabang nga gidalit sa kagamhanang dakbayan.
Alegasyong kalapasan sa Anti-Graft and Corrupt Practices Act, Technical Malversation, Misconduct, and Conduct Prejudicial to the Best Interest of Service nga giduso batok sa Mayor.
Matod sa maong reklamo, ang pundong gigamit sa maong pagpamalit sa bugas kay matod pa gikan sa budget sa Cebu City Disaster Risk Reduction and Management Office (CCDRRMO).
Gi-kwestiyon sa mga reklamante ang pagpang-apod niini tungod kay wala may kalamidad nga nasinati ang dakbayan sulod sa unang bahin sa tuig 2025.
Gawas kang Mayor Garcia kay lakip sa napasakahan og kaso sa maong reklamo kay si CCDRRMO Operations Head Harold Alcontin ug City Social Welfare and Services Head Portia Basmayor.
Gisuwayan sa Bombo Radyo Cebu Newsteam sa pagkuha sa iyang habig si Mayor Garcia apan nagdumili una kini tungod kay tukion pa sa iyang kampo ang reklamong giduso.
