CEBU CITY- Nikompirmar si Eduardo Montealto Jr., ang Regional Directoe sa Land Transportation Franchising and Regulatory Board – Central Visayas (LTFRB -7), nga karong adlawa, Abril 16, daghan na ang mga pasahero sa terminal dinhi sa Dakbayan, nga may kalabotan sa pagsaulog sa Semana Santa.
Sa eksklusibong pakighinabi sa Bombo Radyo Cebu Newsteam kang Director Montealto, iyahang na subay na sa pagkakaron, nagkonsentrar na sila kalabot sa ilang misyon nga “road worthiness” nga nagtumong sa kondisyon sa usa ka sakyanan sa katakus niini nga luwas ug legal nga mag-operate sa mga pampublikong dalan.
Ang maong “road worthiness,” naglakip sa mga hinungdan susama sa mekanikal nga kahimtang sa sakyanan, kondisyon sa preno, ligid, suga, uban pang kagamitan sa kaluwasan, ug pagsunod sa tanan nga magamit nga mga balaod ug regulasyon. Kini subay sa gihatag nga direktiba gikan sa LTFRB Central Office.
Dugang nga saysay ni Montealto, inubanan sa PDEA ug LTO, gisugdan na usa nila ang surprise drug test, diin, adunay 3 ka operators ang nagpositibo “primarily”, ug kon mapamatud-an na, hatagan dayon sa LTO og silot ang operator ug ipagawas dayon ang show cause order.
Kung adunay mga sitwasyon usab nga magdumili ang mga operator sa pagpahigayon sa nasangpit nga testing, aduna silay silot ug direktang makuha ang show cause order, kay matod ni Montealto, ilaha kanang buhaton kay kabahin man kini sa ilahang trabaho nga unahon ang kaluwasan sa katawhan.
Sa pikas bahin, gisusi usab nila ang mga unit sa bus, nga kung 14-anyos na ang bus, dili na kini maka-avail sa special permit. Dugang pa niini, adunay 89 ka units ang nakakuha na sa special permit, 11 gikan sa Cebu North Bus Terminal, samtang 78 gikan sa Cebu South Bus Terminal.
Dugang ni Montealto, masaligon siya nga bisan kung adunay daghan nga mga pasahero karong Semana Santa, igo na ang 89 ka mga yunit. Ang gikabalak-an lang, kung magdungan ang pag-abot sa mga pasahero.
Kana ang butang nga ilang giisip nga hagit, apan sila sa ilang labing pagpaningkamot sa paghimo sa modernisasyon, nga sa kadugayan, makabaton sila sa “online booking” aron dali nila mahibal-an kung unsa gyud ang gidaghanon sa mga pasahero sa usa tukmang oras.
Sa katapusan, iyahang giklaro usab ang mahitungod sa karon nga butang susama sa ‘standing passengers’ nga gidili nila nga gitugotan. Kay ugaling aduna, pakanaogon ang gabarog nga pasahero ug isyuhan usab ang mga operator nianang tungura.(Bombo Irene Ardiente)
