Gisalikway sa International Criminal Court (ICC) ang hangyo sa kampo ni kanhi Presidente Rodrigo Duterte nga hugtan ang madawat nga mga dokumento sa pag-ila sa mga biktima sa drug war sa kasong crimes against humanity batok kaniya.
Sa desisyon nga gipagawas niadtong Abril 17, gitugotan sa ICC Pre-Trial Chamber I ang rekomendasyon sa ICC Registry nga dawaton ang lain-laing matang sa government-issued IDs sama sa birth certificates, senior citizen cards, barangay certificates, driver’s license, ug uban pa ug dili lang pasaporte o National ID nga gipangayo sa kampo ni Duterte.
Ang abogado ni Duterte, nga si Nicholas Kaufman, niinsistir nga kinahanglang hugtan ang mga rekisitos aron malikayan ang pagpanikas ug pagkasayop sa pagkatawo, apan ang mga abogado sa mga biktima misupak niini, nga nagtawag sa proposal nga “anti-poor.”
Sumala sa ICC, ang kasamtangang proseso sa pag-verify igo na aron masiguro ang pagkatawo sa mga biktima ug malikayan ang pagpanglimbong.
Samtang, nagtakda usab ang ICC og deadline sa prosekusyon hangtod sa Hulyo 1 aron isumite ang tanang ebidensiya nga ipresentar sa confirmation-of-charges hearing nga gikatakda sa Setyembre 23, 2025 diin naglakip kini sa testimonya sa mga saksi, video ug audio recording, ug kapin sa 9,000 ka pahina sa mga dokumento.
Kahinumduman nga nag-atubang si Duterte og kasong crimes against humanity kalabot sa 43 ka giingong extrajudicial killings gikan niadtong 2011 hangtod 2019, lakip na ang mga insidente niadtong mayor pa siya sa Davao City.
