Gitakdang mosaka ang bayronon sa serbisyo sa eroplano.
Kini basi sa memorandum nga giluwatan sa Civil Aviation Authority of the Philippines (CAAP) diin gipaabot nga pagsaka sa travel demand tungod sa summer season.
Sa memorandum circular nga gipirmahan niadtong Abril 4, ang CAAP nipahibalo nga ang passenger service charge (PSC) alang sa mga international flights mosaka ngadto sa P900 gikan sa kasamtangang P550.
Samtang sa domestic flights, ang mga pasahero kinahanglang mobayad og P350 kon mobiyahe gikan sa international airports, P300 sa principal class 1 airports, P200 sa principal class 2 airports ug P100 sa community airports.
Sa pagkakaron, ang passenger service charge alang sa domestic flights anaa sa P200.
Ang nasangpit nga memo gitakdang mahimong epektibo 15 ka adlaw human kini mapublikar sa 2 ka mantalaan sa kinatibuk-ang sirkulasyon.
