Patubagon sa Commission on Elections (COMELEC) Committee on Kontra-Bigay si senatorial aspirant Camille Villar sa giingong pagkalambigit niini sa vote-buying nga nahitabo sa usa ka panagtapok sa Brgy Buhay na Tubig, Imus, Cavite.
Basi sa post sa social media sa usa ka wala mailhing reklamante, daw usa ka raffle nga nanghatag og kuwarta ang nakita sa panagtapok uban ni Villar sa stage.
Matod ni Kontra-Bigay Committee Head Atty. Teopisto Elnas Jr., nga mao kini ang imbestigahan sa ilang komite, busa magpadala usab sila og show-cause order ngadto sa kandidato aron ipasabot nga dili kini angay isipon nga vote-buying.
Giklaro ni Elnas nga ila pa kining giimbestigahan ilabi na kon ang maong panagtapok apil ba sa campaign period.
Matod niya nga base sa Resolution 11104 sa poll body kalabot sa vote-buying, bisan og dili si Villar mismo ang nanghatag sa kuwarta apan makita ang iyang presensya sa paghatag ug pagdawat sa kuwarta, kabahin kini sa presumptions sa resolusyon sa komisyon ug ang kandidato ra ang modepensa niini.
Hatagan og tulo ka adlaw si Villar pagpasabot nganong dili kini angayang ikonsiderar nga vote-buying, nga mahimo usab nga rason sa iyang pagka-disqualify niining National ug Local Elections.
Si Villar maoy unang nasudnong kandidato nga naisyuhan og show-cause order kalabot sa vote-buying karong midterm elections.
Samtang basi sa gipagawas nga pamahayag ni Villar, gihimakak dayon sa kandidato ang mga pasangil sa poll body batok kaniya kalabot sa giingong vote buying nga nahitabo kaniya.
Gikanayon niini nga ang panagtapok nahitabo niadtong Pebrero 9 ug dili pa bahin sa campaign period. Dugang pa niya nga andam siyang modawat sa show-cause order nga isilbi kaniya sa komisyon.
Ang poll body magpadayon sa pag-imbestigar niini ug paningkamutan nga masulbad dayon kini sa dili pa ang eleksyon sa Mayo 12.
