CEBU CITY- Nasikop mga kapulisan sa Mabolo ang 25-anyos nga si alyas “Jun,” ug ang iyahang 16-anyos nga kauban, human giingung nanglugos sa 17-anyos nga babaye human manag-inom sa Brgy. Apas, dakbayan sa Sugbo niadtong Huwebes, Abril 24,2025.
Sa ikslusibong pakighinabi sa Bombo Cebu Newsteam ni Police Lieutenant Colonel Maria Theresa Macatangay,Deputy Director for Operations sa Cebu City Police Office (CCPO) , gitino niini nga ang maong 16-anyos gikatahong gidala sa mga suspek sa usa ka ngit-ngit nga dapit samtang anaa pa kini sa impluwensya sa ilimnong makahubog, diin padung na unta ni sila manguli sa ilahang tagsa-tagsa ka panimalay.
Dugang pa, nga ang maong dalagita nibutyag sa kapulisan nga giingong gipugos siya nga hukasan sa iyahang sapot, bisan pa sa iyahang paghangyo nga pahunongon na sila.
Apan kay hubog man ang biktima, wala na kini igong panimuot aron madepensahan ang iyahang kaugalingon, hinungdan nga nagmalampuson ang mga suspek sa ilahang dautan nga tinguha.
Kini nahitabo sa kasagbutan nga bahin, duol sa panimalay sa biktima, hinungdan nga na-iwagan sila sa inahan, human niini gipangita ang iyahang anak.
Nagresulta kini sa pagkasakop sa inahan sa pagpahimulos sa mga suspek sa iyahang anak.
Ang insidente nahitabo mga kaadlawon ug na-report sa mga otoridad sa buntag, ug daling gidakop sa mga operatiba ang 25-anyos nga si alyas “Jun,” ug ang iyang 16-anyos nga kauban.
Kung diin, usa ka hot-pursuit operation ang gilusad sa kapulisan ug ang duha ka indibidwal nasikop sa tagsa-tagsa nila ka balay sa susamang adlaw.
Sa kasamtangan, gitanggong na sila si alyas Jun ug ang menor de edad sa custodial facility sa Mabolo Police Station, ug gihikay na ang kaso nga ipasaka batok sa mga suspek.(BOMBO IRENE ARDIENTE)
