Nanawagan ang Bureau of Internal Revenue (BIR) sa publiko, partikular sa mga retailer o tigbaligya og vape products, nga susihon pag-ayo ang mga produkto nga ilang gibaligya.
Mipahibalo mismo ang kasamtangang commissioner sa BIR nga si Commissioner Romeo D. Lumagui Jr., sa ilang panawagan sa mga negosyante nga susihon kon lehitimo ba ang mga vape products nga ilang gibaligya.
Gipahinumduman usab niya sila nga irehistro ang ilang mga negosyo sa Department of Trade and Industry (DTI) aron mahimong legal ang pagbaligya.
Gipahinumdoman usab niya sila nga dili kalimtan ang pagbayad sa mga buhis, ilabi na ang excise tax sa mga produkto nga gibaligya.
Hugot nga nipasidaan sa publiko si Commissioner Lumagui Jr., nga dili sila magpanuko sa paggukod sa mga makalapas sa balaod.
Matod niya seryoso sila nga mopasaka og mga kaso kon mahibaw-an nga ilegal ang operasyon sa usa ka negosyo.
Sa laing bahin, gipahibawo sa maong commissioner nga mahimong i-surrender sa mga negosyante ang vape products nga giingong dili lehitimong gibaligya ngadto sa ilang buhatan.
Dungan sa iyang pahimangno, iyang giawhag ang publiko, ilabina ang mga negosyante, nga magmapilion sa mga negosyo nga ilang sudlon ug likayan ang pagbaligya sa mga produkto nga wala makabayad sa excise tax.
Angayang hinumdoman nga ang maong commissioner bag-o lang miadto sa Department of Justice (DOJ) aron pasakaan og daghang kaso sa tax evasion ang pipila ka mga kompanya nga wala mobayad og buhis.
