Kasarangang pagbuto ang nahitabo sa summit crater sa Kanlaon Volcano alas sa alas 02:55 sa buntag nga milungtad ug lima ka minuto ug nagmugna ug baga nga abo nga bul-og nga moabot sa 4.5 kilometros ang gitas-on, karong adlawa, Mayo 13, 2025.
Usa ka kusog nga daguok sa buto ang nadungog sa Barangay Pula, Canlaon City, Negros Oriental ug La Castellana, Negros Occidental, samtang ang nagdilaab nga pyroclastic density currents (PDCs) mikunsad gikan sa habagatang bahin sa bulkan.
Dagkong mga bato ang gilabay palibot sa bunganga sa bulkan ug nasunog ang mga tanom, samtang ang nipis nga abo nahulog sa pipila ka barangay sa Negros Occidental.
Nagpabilin ang Alert Level 3, nagpasabot nga adunay risgo sa laing pagbuto, busa girekomendar ang padayon nga pagbakwit sulod sa 6-km radius gikan sa summit crater.
Ang mga apektadong residente gitambagan sa paggamit sa respiratory protection, samtang ang mga lokal nga gobyerno ug civil aviation authority giawhag sa pag-andam alang sa mas grabe nga mga katalagman ug paglikay sa paglupad duol sa bulkan.
