Kung unsa’y badlis sa kapalaran, matuman ug matuman gayod ang tanan.
Kini ang nahitabo sa 21-anyos nga estudyante sa De La Salle University kon DLSU-Manila nga si Jamila Ruma, kinsa taliwa nga nagtungha pa sa Bachelor of Arts in Development Studies, wala magdahom nga mahimo siyang pinakabata nga mayor sa Pilipinas.
Nakaani kini og nagkandaiyang mga reaksyon sa katawhan human ang hingpit nga pagproklama kaniya sa Municipal Board of Canvassers isip mayor sa Rizal, Cagayan.
Siya mohulip sa nabiyaang kandidatura sa iyang amahan nga si Mayor Joel Ruma, human kini gipatay pinaagi sa sniper samtang nangampanya.
Nasayran nga ang amahang Ruma, kinsa usa ka abogado, mitambong sa usa ka campaign sortie sulod sa gymnasium sa Barangay Iluru, Rizal, Cagayan, niadtong Abril 23, sa gabii dihang usa ka sniper ang mipusil kaniya.
Gidala pa siya sa ospital apan namatay gihapon rason nga ang iyang 21-anyos nga anak nga si Jamila, maoy midagan sa mga ka-atbang niining sila Ralph Mamauag ug Florence Littaua.
Nasayrang gawas sa kanunay nga pagka-dean s lister, midaog usab si Jamila og Best Thesis Presenter ug nakadawat og ”Best Thesis” honor sa ilyang klase.
Aminado si Jamila nga dakong hagit alang kaniya ang pagpadayon sa nasugdan sa iyang amahan apan dili matud pa siya musurender tungod kay tinud-anay ang iyang serbisyo uban sa pagbulig sa Kahitas-an.
