Gipirmahan ni Presidente Ferdinand R. Marcos Jr. ang balaod nga nag-amendar sa Republic Act (RA) 11235 o ang Motorcycle Crime Prevention Act, aron mapahapsay ang mga lakang sa kaluwasan sa motorsiklo ug penalties.
Sumala sa RA 12209, nga gipirmahan ni Marcos niadtong Mayo 9, ang mga tigbaligya kinahanglang magparehistro sa mga motorsiklo sulod sa lima ka adlaw human sa pagbaligya sa awtorisasyon sa tag-iya, samtang ang mga tag-iya kinahanglang mo-report sa pagbaligya o disposisyon sulod sa lima ka adlaw.
Ang bag-ong mga tag-iya kinahanglang mobalhin sa pagpanag-iya sulod sa 20 ka adlaw gikan sa pag-angkon.
Ang Land Transportation Office (LTO) gimandoan sa pag-isyu og registration certificates sulod sa duha ka adlaw human madawat ang kompletong documentary requirements, lakip ang clearance gikan sa Philippine National Police-Highway Patrol Group.
Ang mga tigbaligya og motorsiklo gikinahanglang mosumitir ngadto sa LTO og tinuig nga report sa kahimtang sa tanang nabawi nga mga motorsiklo nga ubos sa ilang kustodiya.
Ubos sa giusab nga balaod, ang orihinal nga grabe nga mga multa ug pagkabilanggo gikunhuran pag-ayo.
Ang dealer, orihinal nga tag-iya, o ang bag-ong tag-iya nga mapakyas sa pagtuman sa mga rekisitos kinahanglang mobayad og multa nga dili molapas sa PHP5,000, ubos sa kanhing PHP20,000 ngadto sa PHP50,000 ug pagkapriso.
Ang pagdrayb nga walay plaka o mabasa nga number plate aduna nay multa nga P5,000, ubos usab sa kanhi maximum nga PHP100,000.
Ang dili maka-report sa nawala nga plaka sulod sa 72 ka oras pahamtangan usab og multa nga PHP5,000, ubos sa orihinal nga range nga PHP20,000 ngadto sa PHP50,000.
Ang paggamit sa gikawat nga plate number aduna nay multa nga dili molapas sa PHP20,000, minusan gikan sa kanhi PHP50,000 ngadto sa P100,000 nga multa o prision mayor (unom ngadto sa 12 ka tuig nga pagkabilanggo).
Ang pagpapas, pag-tamper, pag-forging, pagsundog, pagtabon o pagtago sa usa ka number plate o mabasa nga number plate karon mosangpot sa unom ka bulan ngadto sa duha ka tuig nga pagkabilanggo nga silot ug P10,000 nga multa, mas gaan nga silot kon itandi sa orihinal nga unom ka tuig nga maximum nga pagkabilanggo.
Ang mga tag-iya sa motorsiklo nga adunay mga plaka nga dili subay sa probisyon sa RA 12209 gikinahanglan nga mag-renew sa ilang rehistro ug mag-aplay alang sa gikinahanglang mabasa nga plate number dili molapas sa Disyembre 31, 2025.
Gihatagan ang LTO hangtod Hunyo 30, 2026 sa paghimo, pagpagawas ug pag-isyu sa mga plate number.
Ang LTO gimanduan usab sa pag-isyu og mas dako, mabasa, ug color-coded nga number plate sa matag motorsiklo, subay sa font style ug size nga gilatid sa implementing rules and regulations sa giusab nga balaod.
Ang impormasyon sa mga plate number kinahanglang mabasa gikan sa likod nga bahin sa motorsiklo sa gilay-on nga labing menos 15 metros gikan sa motorsiklo.
Ang RA 12209, nga gipublikar niadtong Miyerkoles, mo-epekto 15 ka adlaw human kini mamantala sa Official Gazette o sa usa ka mantalaan sa kinatibuk-ang sirkulasyon.(Bombo Irene Ardiente)
