Nanawagan si U.S. President Donald Trump og “imbistigasyon” batok sa 2024 Presidential election rival niini nga si Kamala Harris, tungod sa giingong pagbayad sa mga celebrity baylo sa ilang suporta sa kampanya.
Sa usa ka post sa Truth Social, si Trump miingon nga ang mga kandidato gidid-an sa pagbayad alang sa mga endorsement, usa ka butang nga giingong gibuhat ni Harris pinaagi sa giingong pagbayad alang sa “kalingawan.”
Kahinumduman nga nakigtambayayong si Harris sa bantog nga mga personalidad sama nila Beyonce, Oprah Winfrey, ug Bruce Springsteen.
Gikumpirmar ni Winfrey nga nakadawat siya og $1 milyon nga bayad alang sa paghimo sa usa ka kalihokan alang sa kampanya, ug gihimakak sa kampo ni Harris ang tsismis nga $10 milyon ang gibayad ngadto kang Beyoncé.
Gisaway usab ni Trump ang giingong pagbayad ni Springsteen alang sa usa ka campaign rally sa Georgia, ug gitawag ang singer nga “highly overrated” human niya gisaway ang administrasyon sa usa ka concert sa UK.
Gipasabot sa kampo ni Harris nga legal ug transparent ang tanan nilang galastohan, ug $75 lang ang gasto nga may kalabotan sa pag-endorso ang gitaho sa ilang opisyal nga mga record.
