Naglaum ang Sugar Regulatory Administration (SRA) nga ang produksiyon sa asukal mosaka hangtod sa lima ka porsyento (5%) karong panahon sa pagpananom (cropping season).
Base sa projection sa SRA, ang kinatibuk-ang produksiyon sa asukal karong panahona mahimong moabot sa 1.837-milyon Metric Tons, mas taas og dyutay sa inisyal nga banabana nga 1.782-milyon Metric Tons.
Matod ni SRA Administrator Pablo Luis Azcona, ang produksiyon sa pagkakaron niabot na sa 1.815-milyon Metric Tons nga asukal samtang ang dugang nga gidaghanon sa asukal padayon pa nga natala.
Ang Visayas padayon nga nagpabiling pinakadako nga producer, nga nakatampo sa 71% sa pagkakaron nga produksiyon samtang ang Mindanao nagtampo og 24%.
Samtang singko porsiyento lang ang produksiyon sa Luzon.
Matod ni Azcona, ang gamay nga pagtaas sa produksiyon sa asukal karong panahon sa pagpananom bisan pa sa epekto sa El Niño, lakip na ang makadaghang pagbuto sa bulkang Kanlaon nga nakaapekto sa mga umahan sa tubo sa Kabisay-an.
Mao sab ni ang mga rason nganong niubos og gamay ang projection sa SRA karong panahon sa pagpananom.
Ang rason sa gamay nga pag-usbaw gitumbok mao ang mas taas nga pagtubo sa matag ektarya nga gitamnan o mas taas nga volume sa tubo nga naani kada ektarya, kon itandi sa gidaghanon nga naani sa miaging mga panahon.
