Usa ka barko sa China Coast Guard (CCG) ang nagpabuto og water cannon ug mibangga ang usa ka barko sa Bureau of Fisheries and Aquatic Resources (BFAR) sa Pag-asa Cay 2 o Sandy Cay sa West Philippine Sea niadtong Miyerkules, Mayo 21, 2025.
Sa usa ka pamahayag, ang BFAR mikompirmar nga ang duha ka mga barko niini, ang BRP Datu Sanday ug BRP Datu Pagbuaya, kay nagpahigayon og routine mission uban sa usa ka scientific team sa pagkolekta og sand sample sa lugar isip kabahin sa maritime scientific research initiative sa dihang giharas na usab kini sa Chinese vessel.
Matod sa ahensya, ang CCG vessel 21559 kay nagpabuto og water cannon ug midasmag sa BRP Datu Sanday sa makaduha ka higayon nga miresulta sa daghang kadaot sa “port bow” ug “smokestack” sa barko sa Pilipinas, nga nagpameligro sa kinabuhi sa mga sibilyang pasahero nga sakay niini.
Ang BFAR niingon nga kini ang unang higayon nga ang Chinese vessel migamit og water cannon batok sa BFAR research vessel sa Sandy Cays.
Bisan pa sa agresibo, delikado ug ilegal nga aksyon sa Chinese vessel, ang Philippine scientific team nakahimo sa pagkompleto sa ilang misyon sa Sandy Cays 1, 2 ug 3.
