Mipadayag ang kadaghanan sa mga midaog nga miyembro sa Liberal Party (LP) sa nagkalapad nga supermajority coalition sa House of Representatives og suporta sa Speakership ni Leyte Rep. Martin Romualdez sa 20th Congress.
Sa pagkalakip sa mga sakop sa LP, gikan sa 278 ngadto sa 285 ka mga midaog nga kongresista sa bag-ohay nga piniliay ang nipadayag og suporta kang Speaker Romualdez.
Matud ni Deputy Speaker David “Jayjay” Suarez sa Quezon, kini nagpamatuod sa nagkadako nga panaghiusa sa nagkalain-laing partido nga si Speaker Romualdez mao gihapon ang labing epektibo ug angayan nga mangulo sa Ubos Balay Balauranan sa nahibiling tulo ka tuig sa Marcos Administration.
Ang supermajority bloc sa 20th Congress naglakip sa mga dagkong partido sama sa Lakas-CMD, Nacionalista Party (NP), National Unity Party (NUP), Nationalist People’s Coalition (NPC), Partido Federal ng Pilipinas (PFP), Party-list Coalition Foundation Inc. (PCFI), ug LP.
Ug alang sa daghang mga magbabalaod, ang desisyon sa kadaghanan sa mga miyembro sa LP nga makig-alayon sa ilang kaugalingon uban ni Speaker Romualdez nagpakita sa pag-ila sa iyang kahanas sa pagpangulo ug katakus sa pagpatuman sa mga palisiya-mga kalidad nga hinungdanon sa panahon nga ang epektibo nga paghimo sa balaod ug panaghiusa sa institusyonal kinahanglan nga mopatigbabaw.
