Gidepensahan ni US President Donald Trump ang desisyon sa iyang administrasyon nga babagan ang mga langyaw nga estudyante gikan sa Harvard University, human temporaryo nga gisuspinde sa korte ang aksyon.
Sa iyang post sa Truth Social, gipangutana ni Trump kung ngano nga wala giingon sa Harvard nga dul-an 31% sa ilang mga estudyante kay mga langyaw ug wala sila mitabang sa nasud.
Dugang pa ni Trump nga kinahanglang masayran sa iyang gobyerno kung kinsa ang mga langyaw nga estudyante nga nagtungha sa nasud, ilabi na kay ang gobyerno naghatag og binilyon nga dolyares ngadto sa Harvard.
Kahinumduman nga gisuspenso ni Homeland Security Secretary Kristi Noem ang katungod sa Harvard nga modawat og mga langyaw nga estudyante, tungod sa giingong kapakyas niini sa paghatag og datos sa mga visa holders nga giingong nalambigit sa bayolenteng mga kalihokan.
Apan gipahunong dayon kini sa korte human nipasaka og kaso ang Harvard, nga nag-ingon nga ang aksyon sa gobyerno kay ilegal, dili makatarunganon, ug dili uyon sa konstitusyon.
Gani ang crackdown kabahin lamang sa mas lapad nga kampanya sa administrasyong Trump batok sa mga unibersidad sa Amerika, lakip ang pag-freeze sa $2.2 bilyon nga grants ug $60 milyon nga kontrata sa Harvard.
Pagdeport sa langyaw nga mga estudyante nga nalambigit sa pro-Gaza nga mga protesta, tungod sa giingong pagsuporta sa grupo sa Hamas ug pag-imbestigar sa mga programa sa diversity nga giingon sa gobyerno nga kinahanglang balanse.
