MANDAUE CITY,CEBU- Na-rescue ang usa ka 14-anyos nga bata ug nasikop ang iyahang 31-anyos nga uyoan, atol sa gipahigayon nga sa buy-bust operation sa Kapulisan sa Dakbayan sa Mandaue sa Brgy. Subangdaku, karung adlawa Lunes, Mayo 26, 2025.
Atol sa pakighinabi sa Bombo Newsteam kang Police Lieutenant Colonel Mercy Villaro, tigpamaba sa Mandaue City Police Office, gitino niini nga ang 14-anyos giingong gigamit sa iyang uyoan isip drug courier.
Gidugang niini, nga ang maong menor de edad usa ka lalaki, 14 anyos, residente sa San Roque, Talisay City, Cebu.
Nasuta nga ang mga personahe sa Kapulisan, nagpahigayon og checkpoint operation sa M. Logarta St., Subangdaku, Mandaue City nga niresulta sa pag-rescue sa nahisgutang menor de edad human kini nasakpan sa akto nga naghupot ug usa (1) ka heat-sealed transparent nga adunay sulod nga white crystalline substance nga gituohang shabu.
Ang maong menor de edad gi-turn-over na karon sa CSWS alang sa saktong disposisyon.
Samtang, ang nasakmit nga white crystalline substance nga gituohang shabu nga gibana-banang motimbang og 0.04 gramos ug Standard Drug Price value nga Php 272.00 ang gisumite sa Regional Forensic Unit.
