Nanawagan si Presidente Ferdinand R. Marcos Jr. sa mga lider sa Association of Southeast Asian Nations (ASEAN) nga paspasan ang pagsagop sa usa ka legally binding Code of Conduct (COC) sa South China Sea, samtang nagpadayon ang pagsaka sa tensyon sa rehiyon.
Namulong ang Presidente atol sa 46th ASEAN Summit sa Kuala Lumpur, Malaysia, diin siya miingon nga ang COC importante sa pag-amping sa katungod sa kadagatan, pagpalambo sa kalig-on, ug pagpugong sa sayop nga kalkulasyon sa dagat.
Subay niana, kahinmdoman nga kaniadtong miaging semana, duha ka mga barko sa Bureau of Fisheries and Aquatic Resources (BFAR) ang nakaangkon og kadaot human ang mga barko sa China Coast Guard (CCG) ni-sideswipe ug gi-water cannon samtang nagpahigayon og marine scientific research missions sa Pag-asa Cay 2 (Sandy Cay).
Ang teritoryo nahimutang sa kasadpan sa Pag-asa Island sa Kalayaan Island Group. Gitawag sa China ang lugar nga Tiexian Jiao ug padayon nga giangkon kini nga bahin sa teritoryo niini bisan pa sa mga internasyonal nga desisyon nga nagsalikway sa daghang mga pag-angkon sa dagat.
Ang dugay na nga nalangan nga Code of Conduct, nga gituyo sa pag-establisar og mga lagda ug pagpugong sa panagbangi sa mga katubigan, gipailalom sa negosasyon sulod sa kapin sa duha ka dekada tali sa ASEAN ug China.(Bombo Irene Ardiente)
