Gibasol sa China Coast Guard ug sa Chinese Embassy sa Pilipinas ang Philippine vessel sa bangga nga nahitabo sa West Philippine Sea niadtong Setyembre 18.
Matod sa Embahada sa China, ang barko sa Pilipinas nga numero 3015 giingong mihimo og “unprofessional maneuver” ug tinuyo nga mitabok sa agianan sa barko sa Chinese Coast Guard nga Sanzhou’ao, nga gikatahong maoy hinungdan sa bangga.
Miinsistir ang CCG nga balik-balik nga gipasidan-an ang barko sa Pilipinas sa wala pa kini giingong kalit nga mibalhin sa direksyon ug mipadali sa dagan.
Nagpahayag ang Beijing nga ang Pilipinas ang adunay bug-os nga responsibilidad sa insidente ug giawhag niini ang Manila nga hunongon ang giingong mga “provocative act” o mga lihok nga makapahagit.
Kini sukwahi sa pahayag nga gipagawas sa Philippine Coast Guard.
Matod sa PCG, gibanggaan sa barko sa China ang barko sa BFAR nga BRP Datu Magat Salamat samtang nagpahigayon kini og maritime patrol ug misyon sa paghatag og fuel subsidy alang sa mga mangingisdang Pilipino, mga 54 nautical miles gikan sa baybayon sa Palawan.
Gitaho sa PCG nga mihimo og peligroso nga maniobra ang barko sa China sa wala pa ang bangga, nga miresulta sa kadaot sa mga reiling ug istruktura sa deck sa barko sa BFAR.
Walay gitaho nga mga naangol sa maong insidente.
