Miluwat og summon ang Commission on Elections (Comelec) pinaagi sa Electoral Contests Adjudication Department batok kang Governor-elect Pamela Baricuatro, diin nagmando kaniya sa pagtubag sa giduso nga electoral protest ni outgoing Governor Gwendolyn Garcia.
Ingon man nga gimandoan si Baricuatro sa pag sumiter sa verified nga tubag sa Electoral Contests Adjudication Department sulod sa lima ka adlaw.
Samtang, mipagawas og mensahe si Baricuatro alang kang Garcia nga tagamtamon nalang niini ang mga nahibiling adlaw sa iyang posisyon.
Dugang pagpasabot sa bag-ng napili nga gobernadora nga kinahanglang tahuron ug tumanon ang kabubut-on sa katawhan sa Probinsiya sa Sugbo.
Apan, daw dili pa gihapon madawat ni Garcia ang iyang pagkapildi hinungdan nga mihimo kini sa naasoy nga lakang.
Kini bisan paman sa pagpadayag og dakong kasagmuyo si Baricuatro sa desisyon ni Garcia kalabot sa pagpagawas sa mga mahinungdanong dokumento sa transisyon karung Hunyo 30, ang kataposang adlaw sa iyang termino.
Gihatagan og gibug-aton ni Baricuatro ang kamahinungdanon sa sayo nga pag-access sa mga dokumento aron masiguro ang pagpadayon sa pagdumala ug epektibo nga paghatag serbisyo publiko.
Kana gumikan kay ilahang namatikdan nga ang paglangan mahimong makabalda sa katakus sa iyang team sa pag-andam alang sa diha-diha nga aksyon sa higayon nga siya makalingkod sa katungdanan.
