Padak-an ug palapdan sa Department of Social Welfare and Development – Central Visayas (DSWD-7) ang “Walang Gutom 2027” Food Stamp Program, kay buot niini nga matabangan ang gidaghananon nga 450,000 ka pamilyahan nga nag-antos sa gutom ug malnutrisyon.
Sa kasamtangan, ang maong buhatan nakahatag na og serbisyo ngadto sa 300,000 ka pamilya nga nakadawat og P3,000 nga food credit matag bulan.
Nunot niini, giplanohan sa DSWD nga duganggan pa kini og 300,000 ka pamilya sa ulahing bahin sa 2025, ug 150,000 ka pamilya pa sa katapusan sa 2026, aron makab-ot ang target nga 750,000 ka pamilyahan sa tuig 2027.
Nagkanayon si DSWD Secretary Rex Gatchalian nga ang gigamit sa programa mao ang Electronic Benefit Transfer (EBT) cards nga magamit sa mga accredited nga tindahan aron mapalit ang nutrisyonal nga pagkaon.
Kabahin niini, ang mga benepisyaryo gitudluan kabahin sa nutrisyon pinaagi sa mga sesyon sa edukasyon ug sa detalye sa ilang EBT cards, nga nagpakita kung pila ka porsyento sa ilang food credit ang angay gamiton sa protina, fiber, ug carbohydrates.
Ang mga kwalipikado sa nahisgutang programa mao ang indibidwal nga adunay kita nga dili molapas sa 9,000 matag buwan.
Ang “Walang Gutom 2027” usa ka flagship program sa gobyerno nga nagtinguha nga maputol ang kagutom ug malnutrisyon sa Pilipinas sa tuig 2027, pinaagi sa paghatag og sustainable solution sa mga pamilya nga nagkinahanglan, diin gipanglangtawan sa DSWD nga dunganggan ang kantidad sa food credit nga ihatag sa mga benepisyaryo. | via Bombo Irene Ardiente
