Napalgan nga naglutaw ug wala nay kinabuhi ang usa ka lalaki pasado alas 4 sa hapon niadtong adlaw sa Dominggo, Hunyo 15, 2025, didto sa kadagatan sa may South Road Properties habig sa Pasil Fishport, Barangay Pasil ning dakbayan sa Sugbo.
Matud ni Alberto Tacatani, kapitan sa M/V Khindra Arrianna fishing boat nga gikan pa sa Gentafe, Bohol ug paingon sila sa Pasil Fishport para mag-deliver ug mga isda sa dihang aduna silay nakit-ang naglutaw nga nagkulon nga lawas sa usa taw nga adunay bag ug gituohang wala nay kinabuhi sa kadagatan habig sa Ludo Port.
Ilang dayon kining gireport sa coastguard ang ilang nakita ug giguroy sa ilang pumpboat ang maong patayng lawas paingon sa may Pasil Fishport.
Sa pag-abot sa mga coastguard ilang gihaw-as ang patayng lawas ug gikuha ang bag niini diin didto nakita ang iyang mga ID ug ubang gipanag-iya sa lalaki diin giia kining si Arthuro Alcordo, 79-anyos, taga Poblacion, Lungsod sa Boljoon sa habagatang Sugbo.
Nagsul-ob ang maong lalaki og striped Tshirt, itom nga karsones, sapatos, ug itom nga bag nga adunay sulod nga mga dokumento.
Walay nakita nga mga samad o bun-og sa lawas ang maong patayng lawas ug dako ang pagduda nga nalumos kini.
Sa pagkakaron, ang patayng lawas anaa karon sa St. Francis Funeral Homes diin nagpaabot kini sa mga kabanay nga moila niini.
