Nagpagawas og pasidaan si US President Donald Trump sa Iran nga kung atakehon niini ang Estados Unidos, atubangon niini ang bug-os nga puwersa militar sa Amerika.
Sa usa ka post sa Truth Social, gilimod ni Trump nga ang US nalambigit sa mga airstrike sa Israel sa Iran.
Giangkon ni Trump nga gitabangan sa US ang Israel batok sa mga missile, apan wala nanghilabot sa direktang pag-atake sa Iran.
Gipasigarbo usab ni Trump nga siya ug ang Israel dali nga makatapos sa gubat kung gusto nila.
Sa laing bahin, si Iranian Foreign Minister Abbas Araghchi namahayag nga aduna silay ebidensiya nga nagpakita nga daw gisuportahan sa Estados Unidos ang mga pag-atake nga gihimo sa Israel.
Samtang, gipahayag ni Trump sa usa ka panag-istoryahanay sa Presidente sa Russia nga si Vladimir Putin nga ang mga nasud kinahanglan magtinabangay aron matuldukan na ang panagbangi tali sa Israel ug Iran.
Apan mahinumdoman nga ang mga opisyal sa Russia nipadayag sa ilang padayon nga suporta alang sa negosasyon sa nukleyar nga programa sa Iran.
Ingon man nga nagpahayag usab ang Germany, kauban ang France ug Britain, sa ilang kaandam nga makigsulti sa Iran bahin sa programang nukleyar aron mapugngan ang pagdako sa kahimtang sa Middle East.
