Niangkon si kanhi presidential spokesperson Harry Roque nga iyang gitambagan si kanhi Presidente Rodrigo Duterte nga dili na mobalik sa Pilipinas tungod sa nagkadako nga hulga sa pagdakop sa International Criminal Court (ICC).
Gihimo ni Roque ang pahayag sa usa ka panagtapok sa The Hague, Netherlands, aron paghandum sa ika-100 nga adlaw sa pagkabilanggo ni Duterte, diin, gi-asoy ni Roque ang ilang panag-istoryahanay sa sayong bahin sa 2025 sa wala pa ang posibleng pagdakop sa kanhi Presidente.
Matud pa ni Roque, iya nang gipahinumdoman ang kampo ni Duterte niadtong 2023 nga ang mga imbestigador sa ICC anaa na sa nasud.
Apan, si Roque niingon nga si Duterte wala molunga ug nagpabiling determinado nga mobalik sa Pilipinas, nga gisalikway ang iyang ideya sa pagpangita og asylum sa Hong Kong.
Gibutyag usab ni Roque nga gi-rebook ni Duterte ang naunang flight gikan sa Hong Kong paingon sa Manila, sa wala pa siya gidakop, nga giingon sa mga tigsuporta nga usa ka “extraordinary rendition.”
Sa laing bahin, si Duterte kasamtangang gitanggong sa ICC samtang nag-atubang og mga kasong may kalambigitan sa mga krimen batok sa katawhan kalabot sa iyang duguong “war on drugs.” | Bombo Irene Ardiente
