TALISAY CITY,CEBU- Dakong sunog ang niulbo sa Sitio Mananga 2, duol sa Mananga Bridge, sa Barangay Tabunok, dakbayan sa Talisay kagahapon, Hunyo 25, 2025.
Sa inisyal nga imbestigasyon sa Talisay City Fire Station, kapin sa usa ka gatos ka mga balay ang naugdaw sa sunog tungod kay dikit ug ginama sa light materials ang mga balay hinungdan nga daling mikatap ang kalayo ug gikataho usab kini sa task force alpha.
Usa usab sa mga hagit nga giatubang sa mga mirespondeng kabomberohan mao ang hagip-ot nga dalan ug kinahanglang magkonektar sila og mga hose aron maabot ang nagdako nga kalayo.
Sa report, nagsugod ang sunog sa balay nga gipanag-iya sa usa ka taho vendor nga si Julieto Banguisio.
Diin nakaangkon usab kini og mga paso sa pipila ka bahin sa iyang lawas samtang naningkamot sa pagluwas sa pipila ka mga butang ug mga dokumento sa iyang anak nga kasamtangang nagtungha nianang buntaga.
Sa pagsugod sa sunog, nasuta nga walay tawo sa ilang balay kay ang asawa ni Julieto namalit og mga sangkap sa mga produkto sa taho.
Sa interview sang Bombo Radyo Cebu kay Benjie Cabigas, ang Brgy. kapitan sa Tabunok, Talisay City, niingon nga nahatagan na og first aid ang mga 200 ka mga biktima nga kasamtangang nagpasilong sa Tabunok gym ug mga evacuation tents |Bombo Irene Ardiente
