Nanawagan si Senador Alan Peter Cayetano sa gobyerno nga hangyoon ang International Criminal Court (ICC) nga temporaryong buhian si kanhi Presidente Rodrigo Duterte ug ipaubos siya sa “House arrest.”
Sa resolusyon nga gisang-at ni Cayetano, giingon nga ang temporaryo nga pagpagawas ni Duterte, 80-anyos, kinahanglan tugotan sa humanitarian grounds, kay matod niya, ng kanhi presidente kinahanglang hatagan og katungod nga isipon nga inosente hangtod nga mapamatud-an nga sad-an basi sa balaod sa Pilipinas ug internasyonal.
Ang resolusyon naglangkob sa pakig-coordinate sa ICC nga ibalhin si Duterte sa Philippine Embassy sa The Hague, Netherlands, ug didto ibutang siya ubos sa usa ka matang sa house arrest, modified house arrest, o bisan unsa nga kahikayan nga haom sa desisyon sa korte.
Siya niingon nga kinahanglan nga motuman sa bisan unsang mga kondisyon nga mahimong ipahamtang sa Pre-Trial Chamber, sama sa mga pagdili sa paglihok, pagpabilin sa usa ka piho nga pinuy-anan, pagdili sa pagkontak sa mga biktima o mga saksi, ug pagsunod sa mga tawag sa korte, ug usab ang nagkagrabe nga status sa panglawas ni Duterte, nga gipasangil sa iyang katigulangon ug dugay nga pagkahimulag.
Gipasidan-an niini nga ang iyang pisikal ug emosyonal nga kaayohan mahimong maapektuhan pag-ayo kung magpabilin siya sa prisohan, busa, nanawagan pag-usab si Cayetano alang sa kalooy nga nagpahayag nga ang pagtugot ni Duterte sa higayon nga makauban ang pamilya ug mga higala sa iyang katapusang mga tuig usa ka yano nga porma sa dignidad – ug ang pagdumili kaniya usa kini ka dili makatarunganon.
Sa kasamtangan, si Duterte naa sa kustodiya sa ICC sulod sa upat ka bulan human gidakop sa Interpol niadtong Marso 11, 2025, sa iyang pagbalik gikan sa Hong Kong, diin, napalutsan kini og warrant of arrest sa ICC alang sa mga krimen batok sa katawhan ug gibalhin dayon sa The Hague, Netherlands, diin siya gitanggong karon.|Bombo Irene Ardiente
