PROVINCE OF CEBU- Misuspenso sa ilang mga klase ang pipila ka mga syudad ug kalungsoran sa lalawigan sa Sugbo karong adlawa, Hulyo 17, human sa kusog nga pagbunok sa ulan kagahapong adlawa nga hinungdan sa halapad nga pagbaha ug posibilidad sa landslide.
Sa pakighinabi sa Bombo Newsteam kang Col. Dennis Francis Pastor, ang pangu sa PDRRMO, nga ang monitoring sa Cebu Provincial Disaster Risk Reduction and Management Office (PDRRMO), nagpabiling naka 24-oras nga pagbantay ang ilang buhatan sa mga kritikal nga lugar nga posibleng maapektuhan sa baha ug landslide.
Gipahimangnoan usab ang katawhan nga magmatngon sa lakang sa panahon, ilabi na kadtong nagpuyo sa ubos nga bahin ug kabukiran, aron malikayan ang katalagman.
Tungod sa kadaut nga dala sa walay hunong nga ulan, daghang lokal nga panggamhanan ang mipahibalo sa suspensyon sa klase aron masiguro ang kaluwasan sa mga estudyante ug magtutudlo.
Kini mao ang mga musunod; Toledo City, Borbon, Sibonga, Moalboal, Daanbantayan,Santa Fe, Samboan, Medellin, Alcoy, Tabogon, Bogo City, Santander, San Remigio, Minglanilla, Malabuyoc, Sogod, Tuburan, Tabuelan, Alcantara, Dalaguete, Oslob, Ginatilan ug Badian, ingun man ang Dakbayan sa Sugbo ug Mandaue.
Padayon ang panawagan sa Cebu-PDRRMO sa publiko nga makigkoordinar sa ilang mga lokal nga disaster officials ug magpabilin nga alerto batok sa hulga sa katalagman.
